「關於雞蛋仔伯伯」

「關於雞蛋仔伯伯」

在銅鑼灣大坑擺檔的「雞蛋仔伯伯」吳伯，8月8日離開左我地。
曾經上過吳伯的雞蛋仔製作班，能夠近距離學藝。
伯伯休息時，總係煙不離手。

伯伯除左專心一致炮製雞蛋仔的時間外，其他時候從不抗拒我們的鏡頭，但係記得佢只係會提醒我地，唔好拍到樣，因為曾經被食環署控告，之後慣左唔出鏡，以免惹當局注意。

吳伯的雞蛋仔成本好重，真材實料，以「實心」、外殼脆、內鬆軟見稱，加上堅持用炭火，親身品嚐過後，你會跟《食神》入面，薛家燕的反應一樣，「為什麼？為什麼？為什麼？
為什麼讓我吃到這麼好吃，如果我以後吃不到怎麼辦？」。
係既，睇黎已經無機會再食到同一個口感，伯伯既雞蛋仔製作方法，就算學到，都無地方做到，香港真係狹小得連小販都容納唔到嗎？

仿佛身邊又再次少左一樣東西，上一次消失既集體記憶係咩？可能經已唔記得左，但的確地，呢個香港已經越黎越陌生，有時候甚至好似《MATRIX》咁，每一日見到既人同事，感覺變得好唔真實，變得好唔MAKE SENSE。

好多人開始有「香港家不是家」既感覺，身邊甚至有位朋友，IPAD裝左個美國地產既APPS，日日睇住《北京遇上西雅圖》裡面o個間真係只賣60多萬港幣既兩層房子，夢想可以早日拍拍屁股移民。

「曾幾何時，我地住既係香港，宜家我地住既只係個叫香港既地方。」香港電台主持麥嘉緯說。

要再消失幾多野，先能夠喚醒到我地？
伯伯一路好走。